Центр информационных технологий и лингвистики
ӘҘИПТӘР
Биография
Произведения

Ринат Камал (1954)

Ринат Камал 1954 йылда Мәсетле районының Дыуан-Мәсетле ауылында тыуған. Ауылындағы урта мәктәптә уҡый, колхозда эшләй, армияла хеҙмәт итә. Башҡорт дәүләт университетын тамамлағас, биш йыл мәктәптә балалар уҡыта, һуңынан Башҡортостан радиоһында, Яҙыусылар союзында эшләй. Хәҙер “Ағиҙел” журналының бүлек мөхәррире. Башҡортостандың атҡаҙанған мәҙәниәт хеҙмәткәре.

Ринат Камал — әҙәбиәтебеҙҙә яңы XXI быуат вәкиле. Ижады совет осоро юшҡындарынан, шул саҡтағы соцреализм ҡалыптары ҡоршауынан азат. Әҙип иң тәүҙә иғтибарын шәхестең күңел донъяһына, уның рухы хөрлөгө, милләтенә мөнәсәбәте мәсьәләләренә, ғаиләһе проблемаларына йүнәлтә. Әҫәрҙәре нескә лиризм, психологик тәрәнлек менән һуғарылған. Яҙыу стиле шиғри прозаға тартым, иғтибар үҙәгендә иң тәү нәүбәттә кеше психологияһын асыу, характер тыуҙырыу маҡсаты тора.

Ринат Камал әҙәбиәткә яңырыу дәүерендә, республикабыҙҙың үҙаллылығын яулау мәлендә килде, шуға ижады ла, һүрәтләү алымдары ла, яҙыу рәүеше лә үҙенән алдағы быуын яҙыусыларынан ярайһы уҡ айырылып тора. Мәҫәлән, “Таня-Таңһылыу” һәм “Әлфирә” романдарының сюжеты ваҡиғалар үҫеше нигеҙендә түгел, ә тойғо үҫеше нигеҙендә ҡорола. Уның повестарҙан, хикәйә-новеллаларҙан төҙөлгән “Бәлә”, “Мөхәббәт дошмандары” китаптары донъя күрҙе. Һуңғы ваҡытта әҙип социализм шарттарында йәшәгән бер ғаилә тарихы тураһындағы романдар шәлкеме өҫтөндә эшләй. “Ҡотлояр — Бәхтейәрҙәр” исемле был шәлкемдән “Таня-Таңһылыу”, “Оҙонтал”, “Сабыр йән”, “Әлфирә” һәм “Бала саҡ” романдары баҫылып сыҡты ла инде.